و إنتي حلوة في كل عين

يا حبيبتي أنا قلبي عاشق

و اسمحيلي بكلمتين

كلمتين يا مصر يمكن

هما أخر كلمتين

حد ضامن يمشي آمن

أو مِـآمن يمشي فين

……………………..

شابة يا أم الشعر ليلي

و الجبين شق النهار

و العيون بحرين أماني

و الخدود عسل و نار

و اللوالي ( اللؤلؤ) بابتسامتك

يحكوا أسرار المحار

يللي ساكنة القصر عالي

إيمتى يهنالي المزار

كلميني يا صبية

طال علي َّ الانتظار

كلمتين يا مصر يمكن

هما أخر كلمتين

حد ضامن يمشي آمن

أو مِـآمن يمشي فين

…………………

قصرك المسحور غيلانو

أغبى من دود الغيطان

بعد مص الغصن الاخضر

ينحتوا عضم العيدان

و اللي خلى الارض خضرا

و اللي خلى الدار آمان

عاش بجور ملو جوفه

مات بخوفه من الغيلان

طوّع الغلبان

ما قالش عن شقا العمر اللي كان

كلمتين بمصر يبقوا

هما أخر كلمتين

حد ضامن يمشي آمن

أو مِـآمن يمشي فين

………………..

أدي كلمة من عذابي قلتهالك

باقي كلمة

من حنيني صنتهالك

في الضلوع من دنيا ظلمة

كنت خايف يلمحوها

يقتلوها في سكة ظلمة

سقسقت و النور بشاير بشاير

زهرة الصبار يا سلمى

يا نسيم الشوق يا طاير يا طاير

خد لمصر في الصبح كلمة

طول ما يبقى الركب ساير

بالبصاير و العينين

يبقى ضامن يمشي آمن

يبقى عارف يمشي فين

اول ما نبدي القول نصلي علي النبي

باحب بلدي ويسكرني الغنا والناس

واحب صوت المكن لما يكون داير

واحب قمح السنابل واعشق الدراس

واحب شال الربيع علي كتاف بستان

واغوي سريخ النباتة تحت سن الفاس

واحب عالم وعالم باللي ناقصني

واي فكرة صحيحة ع الخدود تنباس

مدي الخطاوي يا بلدييا ضحكتي الحرة

مدي الخطاوي يا بلدي وانتي شايلة الناس

صحيت المدينة في يوم مالقتش جناينها

القمري طار منها وغربانها جانيينها

السجن خنقة وزنقة البطن يا جنينها

قضبانه سودا وعنيدة بضي صفراوي

صفي الغناوي ع الاسفلت وانا غاوي

ما اغني غير وسط عاريينها وحافيينها

ومن بعيد القمر عوام بلا شاطي

مادخلش شباكي ده عالي وده واطي

هو اللي يعشق عيون بلده يصير خاطي

ده ان كان عشقك يا مصر خطية ونجاسة

طين النجاسة يا نخاسة بلغ باطي